Türkmenistanyň hokkeý boýunça milli ýygyndysy taryhynda ilkinji gezek 2025-nji ýylyň 7 ― 14-nji fewraly aralygynda Hytaýyň Harbin şäherinde geçiriljek IX Gyşky Aziýa oýunlarynyň birinji diwizionynda gatnaşar. Muňa ýygyndynyň 2017-nji ýylda Sapporoda geçirilen Oýunlaryň ikinji ligasynda gazanan ýeňşi mümkinçilik berdi diýip, "Neýtralnyý Türkmenistan" gazetinde habar berilýär.
Türkmenistanyň Hokkeý federasiýasynyň habar bermegine görä, türkmen ýygyndysy Gyrgyzystan, Tailand we Gonkong bilen bir toparçada ýaryşar. Garşydaşlaryň üçüsiniň hem soňky sekiz ýylda düzümlerini güýçlendirip, tejribe toplandylar.
"Galkan" klubunyň ýakynda Aşgabatda geçirilen hokkeý boýunça halkara ýaryşda üstünlikli çykyş etmegi Türkmenistanyň milli ýygyndysynyň Aziýa oýunlarynyň öňüsyrasynda ynamyny has-da artdyrdy.
Mundan başga-da, Yslam ýurtlarynda hokkeýi ösdürmek guramasynyň agzasy bolup durýan Türkmenistan 2025-nji ýyl üçin sport çäreleriniň meýilnamasyny aldy. Resminama laýyklykda, Gurama Türkmenistana bilelikde fijital-sporty - hakyky sport ýaryşlarynyň we kompýuter oýunlarynyň utgaşmasyny ösdürmegi teklip edýär. Şeýle hem "üç üçe" (3х3) hokkeý formatyny ösdürmek meýilleşdirilýär.
