22-nji awgustda Kuala-Lumpur şäherinde Aziýanyň Futbol konfederasiýasynyň ştab-kwartirasynda AFK-nyň Çagyryş ligasynyň ilkinji möwsüminiň bijeleri çekildi. Bije çekişligiň netijelerine laýyklykda, Türkmenistanyň çempiony «Arkadag» futbol topary AFK-nyň Çagyryş ligasynyň «B» toparçasynda çykyş eder.
Bu toparçada Türkmenistanyň çempionyna Kuweýtiň «Al-Arabi», Maldiw adalarynyň «Maziýa» we Gyrgyzystanyň «Abdyşata» toparlary garşydaş boldy.
«Al-Arabi» geçen möwsümde Kuweýtiň Premýer ligasynda ikinji orny eýeläp, özüne yklymyň üçünji derejeli klublaýyn ýaryşyndan orun aldy. «Maziýa» bilen «Abdyşata» bolsa wekilçilik edýän döwletleriniň futbol çempionatlarynyň iň ýokarky diwizionlarynyň çempionlarydyr. Ýöne gyrgyz topary ýaryşa saýlama tapgyrdan goşuldy.
«B» toparçanyň duşuşyklary 26-njy oktýabrdan 1-nji noýabra çenli aralykda merkezleşdirilen görnüşde Kuweýtde geçiriler. Günbatar zolakda toparçada birinji orny eýelän toparlar gönüden-göni adyny çärýekfinala ýazdyryp biler. Bu zolakdaky «A», «B» we «C» toparçalarynda ikinji orny eýelän toparlar bolsa çärýek finalyň nobatdaky bir ýollanmasy üçin öz aralarynda güýç synanyşarlar.
Bije çekişligiň netijesinde AFK-nyň Çagyryş ligasynyň ilkinji möwsüminde aşakdaky toparçalar emele geldi:
Günbatar zolak:
- «A» toparça: «Ist Bengal» (Hindistan), «Nejmeh» (Liwan), «Başundara Kings» (Bangladeş), «Paro» (Butan, ýer eýesi);
- «B» toparça: «Al-Arabi» (Kuweýt, ýer eýesi), «Arkadag» (Türkmenistan), «Maziýa» (Maldiw adalary), «Abdyşata» (Gyrgyzystan);
- «C» toparça: «Al-Ahli» (Bahreýn), «Al-Fotuwa» (Siriýa), «Al-Sib» (Oman, ýer eýesi), «Hilal Al-Kuds» (Palestina).
Gündogar zolak:
- «D» toparça: «Şan Ýunaýted» (Mýanma, ýer eýesi), «Taýwan Stil» (Taýwan), «Ýong Elephants» (Laos);
- «E» toparça: «Madura Ýunaýted» (Indoneziýa), «Preah Han Riç Swaý Rieng» (Kambojiýa), «SP Falkons» (Mongoliýa, ýer eýesi).
