Režissýor Todd Filips “Joker” trilleriniň üçünji bölüminiň meýilleşdirilmeýändigini aýtdy. Onuň sözlerine görä, ilkinji iki filmiň sýužeti wakany doly tamamlaýar, şol sebäpli mundan beýläkki ösüş göz öňünde tutulmaýar.
“Bu iki film surata düşürilende islendik zadyňy etmek, bellibir manysynda gumsagadynda oýnamak gyzykly boldy, ýöne biz aýtmak islän zadymyzy aýtdyk öýdýärin” – diýip, Filips “Variety” žurnaly bilen söhbetdeşlikde aýtdy.
Şeýle-de, Filips Hoakin Feniks bilen hyzmatdaşlygy dowam etdirmek isleýändigini, ýöne başga bir žanrdadygyny aýtdy.
“Hoakin bilen işleşmegi uly höwes bilen dowam etdirerdim, ýöne komediýada, sebäbi ol şeýle erkana we wäşi bolup bilýär. Meniň pikirimçe, adamlar häzir komediýa tomaşa etmek isleýärler. “Joker 2-niň” treýleri “Häzir dünýä gerek zat, bu söýgi” diýmek bilen jemleýär diýseňem bolar. Ýöne men mundan beýläk hem giderdim: bize hezil edip gülmek hem artykmaçlyk etmezdi” diýip, režissýor belledi.
“Joker: iki adamlyk telbelik” ady bilen asyl filmiň dowamy 2024-nji ýylyň oktýabrynda çykar. Film Wenesiýa kinofestiwalynda hödürlener. Birinji “Joker” 2019-njy ýylda çykdy we prokatda bir milliard dollardan gowrak girdeji ýygnap, şol wagt R reýtingli iň girdejili film boldy.
