Britaniýaly lyžaçy Joşua Bregmen beýik daglarda lyža beýsjampingi boýunça täze dünýä rekordynyň eýesi boldy. 34 ýaşly Bregmen beýikligi 5716 metr bolan Gimalaýdaky Mera-Pik depesinde gaýadan lyžaly aşak inip, paraşýutda üstünlikli ýere gondy diýlip, Ginnesiň rekordlar kitabynda aýdylýar.
Rekord fransiýaly türgen Mattias Žiro tarapyndan 2019-njy ýylda 4359 metr beýiklikde goýlan öňki rekorddan ep-esli ýokarydyr.
Rekord gazanmak üçin Bregmen we onuň topary taýýarlyga, şol sanda ýoluň ugruny daşlardan arassalamak üçin iki hepde sarp etdiler.
“Arzuw birnäçe owadan S şekilli öwrümleri etmek we gaýadan ynamly aşak düşmekdi, ýöne bizde diňe 6000 metr töweregi beýiklikde ýönekeý daşly uçuş-gonuş zolagy bardy” – diýip, ol gürrüň berdi.
Bu synanyşyk ilkibaşdaky ýerdäki ýaramaz şertler sebäpli tas başa barmaýardy, ýöne topar tiz wagtdan has amatly eňňidi tapdy.
Rekord doly derejede Bregmeniň özi tarapyndan maliýeleşdirildi. Onuň aýtmagyna görä, ol tehniki enjamlary dostlaryndan aldy, köne lyžalary ulandy we “arzan” eşik geýdi. Onuň synanyşygynyň esasy maksady haýyr-sahawat üçin serişdeleri ýygnamakdy.
