Daniýanyň ululygy boýunça ikinji şäheri Orhusyň demirgazygynda 22 ýaşly talyp-arheolog wikingler eýýamynyň ýedi sany ele dakylýan kümüş halkasyny tapdy. Tapyndylar wikingleriň taryhy ýerlerinde metal gözleýji guralyň we piliň kömegi bilen ýüze çykaryldy diýip, Moesgaard Museum-yň metbugat gullugyna salgylanyp, ABC News habar berýär.
Hünärmenler halkalary biziň eýýamymyzyň, takmynan, 800-nji ýyllaryna degişli hasaplaýarlar, bu bolsa 793-nji ýyldan 1066-njy ýyla çenli dowam eden wikingler eýýamynyň irki döwrüne gabat gelýär.
Taryhçylaryň anyklamagyna görä, bilezikleriň biri häzirki Russiýanyň we Ukrainanyň çäklerinde ýaşan wikingleriň bezeglerinden ylham alnyp ýasalypdyr. Üç halka Günorta Skandinawiýa stilinde ýerine ýetirilipdir, galanlary bolsa Angliýada ýasalypdyr.
Tapyndylaryň umumy agramy 500 gramdan geçýär. Muzeý wikingler döwründe kümşüň onuň eýesiniň kaşaňlygyny we baýlygyny alamatlandyrandygyny belleýär.
