Kopengageniň golaýynda takmynan 600 ýyl ozal gark bolan gämi tapyldy. Deňiz arheologlarynyň pikiriçe, bu häzirki güne çenli tapylan iň uly klinker (tagtalary üst-üste goýlan) gurluşly gämidir.
"Svælget 2" diýlip atlandyrylýan bu gämi Eresunn bogazynda, 13 metr çuňlukda ýüze çykaryldy.
Gözleg işleriniň jikme-jikliklerini Roskille şäherindäki Wiking gämi muzeýiniň hünärmenleri mälim etdiler. Arheologlar gäminiň örän gowy saklanyp galan korpusyny öwrenmek we ondan tapyndylary çykarmak üçin jemi 289 gezek suwa çümdüler. Gämide orta asyr adamlarynyň gündelik durmuşynda ulanan köp sanly zatlary: aýakgaplar, darak, gazan we agaç tabak ýaly gymmatlyklar tapyldy.
Gäminiň ölçegleri haýran galdyrýar:
- Uzynlygy: 28 metr;
- Ini: 9 metr;
- Beýikligi: 6 metr.
"Svælget 2" gämisiniň ýük göterijiligi takmynan 300 tonna bolup, ol uly möçberdäki agaç, kerpiç we azyk önümlerini daşamaga niýetlenipdir.
Şeýle söwda gämileri (koggalar) orta asyr Demirgazyk Ýewropasynda giňden ýaýrapdyr, sebäbi olar az sanly ekipaž bilen uzak aralyklara ýük daşamaga mümkinçilik beripdir. Arheologlaryň bellemegine görä, bu tapyndy şol döwürdäki söwdanyň nähili uly gerime eýe bolandygyny aýdyň görkezýär.
