Gazagystanyň Aktau şäherinde SSSR-iň sport ussady Bokenbaý Saktaganowyň hatyrasyna bagyşlanyp geçirilen boks boýunça halkara ýaryşynda türkmen boksçulary dürli derejeli medallaryň altysyny gazandylar diýip, "Türkmenistan: Altyn asyr" elektron neşiri habar berýär.
«Dosan batyr» sport toplumynda geçirilen ýaryşlara 12 topardan türgenleriň 138-sini gatnaşdy. Şol toparlar Türkmenistana, Täjigistana, Özbegistana, Garagalpagystan Respublikasyna hem-de Gazagystanyň dürli şäherlerine wekilçilik etdiler.
Türkmenistanyň toparynda 9 boksçy çykyş etdi, şolaryň altysy 1 altyn, 1 kümüş hem-de dört bürünç medal eýelediler.
- Altyn medal - Mary welaýatynyň Ýolöten etrabyndaky 1-nji orta mekdebiň 12-nji synp okuwçysy Jeýhun Döwranow 54-kg-a çenli agram derejesinde hormat münberiniň iň ýokary basgançagyna çykdy. Şeýle hem ol «Ýaryşyň tehniki taýdan iň ökde boksçusy» diýen ýörite baýraga-da mynasyp boldy;
- Kümüş medal - Aşgabat şäherindäki 32-nji orta mekdebiň 12-nji synp okuwçysy Meýlis Şadurdyýew (57 kg. çenli);
- Bürünç medal - Aşgabat şäherindäki 52-nji orta mekdebiň 10-njy synp okuwçysy Hangeldi Lukmanow (48 kg. çenli), Aşgabat şäherindäki 82-nji orta mekdebiň 12-nji synp okuwçysy Mekan Sabyrow (60 kg. çenli), Mary welaýatynyň Baýramaly etrabyndaky 2-nji orta mekdebiň 12-nji synp okuwçysy Annageldi Jumamyradow (63,5 kg. çenli) we Daşoguz welaýatynyň Boldumsaz etrabyndaky 57-nji orta mekdebiň 12-nji synp okuwçysy Atageldi Seýidow (67 kg. çenli).
Ýaryşda türkmen boksçulary Türkmenistanyň ýetginjekler ýygyndy toparynyň uly tälimçisi Maksud Şeripowyň hem-de milli ýygyndy toparyň baş tälimçisi Tenilbek Jumakulowyň ýolbaşçylygynda çykyş etdiler, türkmen eminler toparyna bolsa, emin Timur Halilow wekilçilik etdi.
Gazagystandaky ýaryş ýetginjek boksçular üçin Birleşen Arap Emirlikleriniň Abu-Dabi şäherinde 27-nji awgustda ýetginjekleriň we ýaşlaryň arasynda badalga alýan Aziýa çempionatynyň öňýanynda güýçlerini barlamaga gowy mümkinçilik boldy. Bu ýaryş 10-njy sentýabra çenli dowam eder.
