14-nji awgustda Warşawadaky “Narodowy” stadionynda geçirilen UEFA-nyň Superkubogy ugrundaky oýunda Madridiň “Realy” “Atalantany” 2:0 hasabynda utdy. Bu ýeňiş “Realyň” baş tälimçisi Karlo Ançelotti üçin şanly boldy, ol klubuň taryhynda gazanan kuboklarynyň sany boýunça Migel Munýos bilen deňleşdi – 14, diýip, “Çempionat” portaly habar berýär.
Ikinji orny 11 kubok bilen Zinedin Zidan eýeleýär.
Toparyň kapitany, horwatiýaly ýarymgoragçy Luka Modriç bu ýeňşiň netijesinde 27 kubok bilen “Realyň” taryhynda iň köp titully oýunçy boldy. Bu görkeziji boýunça ikinji orunda 26 kubok bilen Daniel Karwahal we klubuň öňki kapitany Naço ýerleşýär.
Ançelotti “Reala” iki döwürde tälimçi boldy: 2013 – 2015-nji ýyllar we 2021-nji ýyldan häzirki wagta çenli. Bu döwürde ol 14 kubok, şol sanda iki Çempionlar ligasyny utdy. 2012-nji ýyldan bäri klub üçin oýnaýan Modriç bu ýeňişlerde esasy oýunçylaryň biri boldy.
