Ýaponiýanyň premýer-ministri Fumio Kisida 14-nji awgustda geçirilen metbugat maslahatynda möhletinden öň wezipesinden gitmegi meýilleşdirýändigini we Liberal Demokratik Partiýanyň (LDP) lideri hökmünde ikinji möhlete dalaş etmejekdigini mälim etdi diýip, “Wedomosti” habar berýär.
Kisida bu kararyny partiýanyň meşhurlygynyň peselmegi sebäpli özgertmeleriň zerurlygy bilen düşündirdi.
“Raýatlara täze, üýtgedilen LDP-ni görkezmeli. Munuň üçin ilkinji ädim meniň işden gitmegim bolmalydyr"-diýip, Nikkei Asia portaly Kisidanyň sözlerini ýetirýär.
LDP we onuň tarapdarlary parlamentiň aşaky palatasyndaky 465 ornuň 290-syna gözegçilik edýärler. Häkimiýet başyndaky partiýa özüne täze lider saýlasa, ol awtomatiki ýagdaýda premýer-ministr bolar. Partiýanyň ýolbaşçysynyň saýlawlary şu ýylyň sentýabr aýynda geçiriler. Ýurtdaky parlament saýlawlary 2025-nji ýylyň oktýabr aýyna meýilleşdirildi.
Kisidanyň karary Ministrler Kabinetiniň reýtinginiň pese gaçmagy bilen ýüze çykdy. Nikkei-ň 2023-nji ýylyň oktýabr aýynda geçiren pikir soraşmasynda reýtingler 20%-den ýokary galmady, emma Kisida 2021-nji ýylda işe başlanda bu görkeziji 60%-den ýokarydy. Muňa täsir eden faktorlar partiýa gaznalarynyň dawasyny, dowamly inflýasiýany we ýapon ýenasynyň pese gaçmagyny öz içine alýar.
Ýerli metbugat öňki Goranmak ministri Sigeru Isibanyň premýer-ministr saýlawlarynda ýeňiş gazanmak mümkinçiliginiň ýokarydygyny nygtaýar. Bloomberg-iň berýän habaryna görä, Sanly ulgama geçiş ministri Kono Taro, Daşary işler ministri Ýoko Kamikawu we öňki premýer-ministr Dzýunitiro Koidzuminiň ogly Daşky gurşaw işleriniň öňki ministri Sindziro Koidzumi hem bu wezipä dalaş edýärler.
