Şu ýylyň ahyrynda Aşgabatda hazarýaka döwletleriniň daşary işler ministrleriniň mejlisini geçirmek meýilleşdirilýär. Bu barada Orient Russiýa Federasiýasynyň Türkmenistandaky işleri wagtlaýyn ynanylan wekili Pýotr Şukine salgylanyp habar berdi.
12-nji awgustda Awazada Hazar deňziniň güni mynasybetli geçirilen maslahatda eden çykyşynda, Şukin bu günki gün Hazar sebitinde hyzmatdaşlyk üçin giň hukuk binýadynyň döredilendigini aýtdy. Ol öz içine dokuz sany hökümetara ylalaşyklaryny we beýanlaryny alýar. Goşmaça resminamalary işläp taýýarlamak we tassyklamak işleri dowam edýär.
Russiýanyň ilçihanasynyň wekili Ýewraziýada Hazar sebitiniň barha artýan baglanyşdyryjy ornuny we "Demirgazyk-Günorta'' ulag geçelgesiniň ähmiýetini belledi. Şeýle hem ol hazarýaka döwletleriniň arasyndaky hyzmatdaşlygy institutlaşdyrmagyň, şol sanda Hazar geňeşini döretmegiň möhümligini belledi.
12-nji awgustda Hazar deňziniñ halkara güni bellenilip geçilýär. Hut şol gün 2006-njy ýylda Hazar deňziniň deňiz gurşawyny goramak boýunça Çarçuwaly konwensiýa (Tähran konwensiýasy) güýje girdi.
