“Türkmen owazy” teleradioýaýlymynyň “Owaz” radioýaýlymy isleg bildirýänleri “Owazdan sowal” bäsleşigine gatnaşmaga çagyrýar. Bäsleşikde ýaýlym arkaly diňleýjilere dürli ugurlar boýunça sowallar berlip, her sowala dogry jogap beren diňleýjiler Türkmenistanyň Telewideniýe, radiogepleşikler we kinematografiýa baradaky döwlet komitetiniň Hünär tehniki okuw mekdebiniň 1,5 ýyl okuwynda öz saýlan islendik hünärinde okamaga hukuk gazanar. Okuwy tamamlan her bir talyba Döwlet nusgasynda diplom berilýär.
Türkmenistanyň Mahabat müdirliginiň habar bermegine görä, bäsleşige islendik adam islendik ýerden ýaýlymda aýdyljak gysga belgä öz jogaplaryny ýollap gatnaşyp biler.
Sowallar 2024-nji ýylyň awgust aýynyň dowamynda her çarşenbe güni sagat 13:00-daky habarlardan soň, “Owaz” radioýaýlymynda “Owazdan sowal” bäsleşiginde diňleýjilere ýetiriler.
Belläp geçsek, häzirki wagtda ýurdumyzda “Iň gowy radio gepleşik” bäsleşigi hem dowam edýär. “Owazdan sowal” gepleşigi hem bu bäsleşige gatnaşýar. “Owazdan sowal” gepleşigine ses berip, goldamak isleýän diňleýjiler 0530 gysga belgä 24 san belgini ýazyp, sms ýollap, ses berip biler.
Ses berlişigiň netijelerini https://turkmentv.gov.tm/vote/21 saýtyndan yzarlap bilersiňiz.
