Geçen dynç günleri Kaliforniýa ştatynyň Anahaým şäherinde geçirilen D23 dabarasynda aýdymçy we aktrisa Maýli Saýrus Disney-iň rowaýata öwrülen şahsyýeti adyna eýe boldy. Ol 31 ýaşynda bu hormatly baýragyň iň ýaş eýesi boldy diýip, Variety habar berýär.
Disney-iň rowaýata öwrülen şahsyýeti ady kompaniýa uly täsirini ýetiren adamlara berilýär. Hanna Montana serialynda adybir gahrymanyň roly bilen belli bolan Maýli Saýrus 2005-nji ýylda Disney-de karýerasyna başlady. Ol özüniň geçen ýoly baradaky ýatlamalary bilen paýlaşyp, nädip birinji kastingden geçmändigi, ýöne ruhdan düşmän, öz arzuwyny hakykata öwrüp bilendigi barada ýatlap geçdi.
“Bu baýrak Hanna we onuň ajaýyp, wepaly muşdaklaryna, şeýle-de meniň arzuwymy hakykata öwren her bir adama bagyşlanýar” – diýip, Maýli Saýrus belledi.
Aýdymçydan başga-da, Disney-iň ösüşine uly goşant goşan hudožnikler, aktýorlar, ssenariýaçylar we režissýorlar, şol sanda režissýor Jeýms Kemeron (“Awatar”), aktýor Harrison Ford (“Indiana Jons we hrustal kelle süňküniň şalygy”), aktrisa Jeými Li Kertis (“Pyçak çykarmak”), aktýor we režissýor Frenk Oz (“Tapmaça 2”), ssenariýaçy Jeýms L.Bruks (“Simpsonlar”) bu baýragyň eýeleri boldy.
