Efiopiýa öz paýtagty Addis-Abebanyň golaýynda bahasy 6 mlrd dollar bolan Afrika yklymynda iň uly halkara howa menzilini gurmak kararyna geldi. Ol ýylda 100 mln ýolagça hyzmat edip biler diýip, Fana teleradiostansiýasyna salgylanyp, TASS habar berýär.
Täze howa menzili ýurduň paýtagtyndan 17 km uzaklykda ýerleşýän Bişoftu (Oromia sebiti) dynç alyş şäherinde gurlar. Toplumyň meýdany 35 inedördül kilometr bolup, gurluşygy bäş ýylyň dowamynda tamamlamak meýilleşdirilýär.
Afrikanyň iň uly we çalt ösýän awiakompaniýasy bolan Ethiopian Airlines täze howa menziliniň dizaýnyny işläp taýýarlamak üçin halkara konsalting topary DAR bilen özara düşünişmek barada Ähtnama gol çekdi. DAR ägirt uly gurluşyk üçin potratçylary saýlamak bilen hem meşgullanar.
Taslamanyň birinji tapgyry ýylda 60 mln ýolagça hyzmat etmek üçin niýetlener, ikinji tapgyryň gurluşygy tamamlanandan soň hyzmat ediş mümkinçiligi 100 mln ýolagça çenli ýokarlanar. Ol ýerde birbada dört uçar gonup biler.
Ethiopian Airlines-iň häzirki howa menzili – Bole ýylda 20 mln ýolagçy kabul edip bilýär.
