Türkmenistanly talyplar şu ýylyň 5—11-nji awgusty aralygynda Beýik Britaniýanyň we Demirgazyk Irlandiýanyň Birleşen Patyşalygynyň London uniwersitetiniň kollejiniň Bolgariýadaky Amerikan uniwersiteti bilen bilelikde geçiren 31-nji Halkara matematika bäsleşiginde (IMC-2024) üstünlikli çykyş edip, ýokary netije gazanmagy başardylar.
Bolgariýanyň Blagoýewgrad şäherinde geçirilen bu bäsleşikde Magtymguly adyndaky Türkmen döwlet uniwersitetiniň, Halkara ynsanperwer ylymlary we ösüş uniwersitetiniň, Türkmen döwlet binagärlik-gurluşyk institutynyň, Seýitnazar Seýdi adyndaky Türkmen döwlet mugallymçylyk institutynyň, Türkmenistanyň Döwlet energetika institutynyň talyplary gatnaşyp, 14 sany dürli derejedäki medallara, ýagny 3 altyn, 3 kümüş, 8 bürünç medala we höweslendiriji Hormat hatlaryna mynasyp boldular. Bu barada Magtymguly adyndaky TDU-nyň resmi saýtynda habar berilýär.
Bäsleşige jemi 60-dan gowrak ýurtdan 400-den gowrak talyp gatnaşdy. Magtymguly adyndaky Türkmen döwlet uniwersitetiniň talyplary bu uly olimpiadada jemi 1 altyn, 3 kümüş, 4 bürünç medal gazandylar.
Altyn medala uniwersitetiň matematika fakultetiniň 3-nji ýyl talyby Nurjanowa Şabibi, kümüş medala maglumat ulgamlary we tehnologiýalary fakultetiniň 4-nji ýyl talyby Maksadow Söhbet hem-de şol fakultetiň 3-nji ýyl talyplary Wellekow Emir, Jepbarow Balkan dagy mynasyp boldular. Bürünç medaly bolsa matematika fakultetiniň 4-nji ýyl talyby Garlyýewa Sähragül, şeýle hem maglumat ulgamlary we tehnologiýalary fakultetiniň 4-nji ýyl talyby Döwletmyradow Salyhbek, 3-nji ýyl talyplary Ataýew Hajymuhammet, Gaýypow Didar dagy gazandylar.
Şol bäsleşigiň dowamynda 60-dan gowrak ýurduň wekilleriniň arasynda geçirilen "The Most Effective Team Leaders in IMC 2024" (Iň tejribeli topar ýolbaşçy IMC 2024) bäsleşiginde Magtymguly adyndaky Türkmen döwlet uniwersitetiniň Matematiki analiz kafedrasynyň mugallymy Agaserdar Ýollyýew kümüş medala mynasyp boldy. Bu ýeňiş topar ýolbaşçylaryň arasyndaky bäsleşikde olimpiadanyň taryhy boýunça ýurdumyzda ilkinji gezek gazanylan ýeňiş boldy.
