Microsoft Windows 11 21H2 we 22H2 wersiýalarynyň goldawynyň ýakyn wagtda gutarjakdygyny habar berdi. 2024-nji ýylyň 8-nji oktýabryndan başlap bu wersiýalar howpsuzlyk täzelenmelerini we beýleki gowulaşdyrmalary almagyny bes eder diýip, Neowin portaly habar berýär.
Ulanyjylara operasion ulgamy has täze wersiýalara çenli täzelemek maslahat berilýär.
Häzirki wagtda 21H2 wersiýaly Windows 11 eýýäm adaty ulanyjylar üçin goldanylmaýar, yzygiderli täzelenmeleri diňe Enterprise, Education we IoT Enterprise ýaly korporatiw wersiýalar alýar. 22H2 wersiýaly Windows 11 üçin Home we Pro wersiýalarynyň goldawy hem 8-nji oktýabrda tamamlanar.
Resmi Windows Health Dashboard saýtynda ýerleşdirilen maglumatlara görä, oktýabr täzelenmesi görkezilen wersiýalar üçin iň soňky bolar. Şondan soň gurluşlar aýlyk howpsuzlyk täzelenmelerini almagy bes ederler.
Ulanyjylaryň eýýäm ulgamy 2025-nji ýylyň 11-nji noýabrynda goldawy gutarjak 23H2 wersiýaly Windows 11-e çenli täzelän bolmagy mümkin. Kompýuteriňizde operasion ulgamyň wersiýasyny bilmek üçin şu boýunça geçiň: “Sazlamalar” >”Ulgam” >”Maglumat” («Настройки» > «Система» > «Информация»).
