X kompaniýasy Habar beriş serişdelerine jogapkär global bileleşige (GARM, brendleriň we mahabat agentlikleriniň birleşmesi) we Bütindünýä mahabat berijiler federasiýasyna garşy kazyýete arza berdi. Arzada bu guramalaryň X sosial ulgamyna "yzygiderli bikanun boýkot (çetleşdirme)" gurandygy tassyklanýar diýip, Financial Times habar berýär.
Sosial ulgamyň eýesi Ilon Mask: "Iki ýyllap parahatçylygy saklamaga synanyşdyk, ýöne indi söweş yglan edýäs" -diýdi.
Ol boýkot edilýän her bir kompaniýa özünden görelde almagy maslahat berdi. Mundan başga-da, kazyýet işi GARM-yň Unilever, Mars we CVS Health ýaly ägirtleri öz içine alýan aýratyn agzalaryna garşy gönükdirildi.
X-iň baş direktory Linda Ýakkarino mahabat berijileriň hereketleriniň diňe bir sosial tora däl, eýsem ulanyjylaryna-da zyýan ýetirendigini aýtdy.
FT neşiriniň belleýşi ýaly, kazyýet işi Mask X sosial ulgamy satyn alandan soň, GARM-yň we onuň agzalarynyň ony boýkot etmek barada dil düwşendigi baradaky hasabatyň palatanyň kazyýet komiteti tarapyndan çap edilenden bir aý soň gozgaldy. GARM-yň şärikdeş esaslandyryjysy Rob Rakowis brendleriň “mahabatdan gelen dollarlaryny” nirä sarp etmelidigini özleriniň çözmäge hukugynyň bardygyny öňe sürüp, şikaýaty ret etdi.
Sosial ulgamyň mahabat berijiler bilen baglanyşykly meseleleri Mask 2022-nji ýylda sosial ulgamy satyn alandan soň başlandy. Täze moderasiýa syýasaty we işgärleriň azaldylmagy, Apple ýaly birnäçe kompaniýalaryň mahabatynyň togtadylmagyna sebäp boldy. Geçen tomus Twitter adyny üýtgedip, guş nyşanyndan ýüz öwürdi. Şol bir wagtyň özünde, Mask mahabat gelýän girdejisiniň takmynan 50% azalandygyny habar berdi. Geçen güýzde Disneý, Warner Bros., Apple we IBM ýaly kompaniýalar hem sosial ulgamlarda mahabat boýkotyny yglan edenlerinde, ýagdaý hasam ýitileşdi.
