Ýaponiýanyň Nissan awtoulag öndürijisiniň amerikan bölümi güneşli günlerde awtoulagyň içindäki temperaturany peseldip biljek innowasion “sowuk boýag” tehnologiýasyny görkezdi. Tehnologiýa synagdan üstünlikli geçdi we kompaniýa ony mundan beýläk ulanmagy meýilleşdirýär.
Nissan-yň görkezen suratynda iki sany meňzeş Nissan Leaf görünýär: olaryň birine adaty boýag, beýlekisine “sowuk” boýag çalnan. Öndürijiniň berýän maglumatlaryna görä, birinji awtoulag ikinjisinden 12° C köp gyzdy, salondaky temperaturanyň tapawudy 5° C. Tehnologiýa Hytaýda, uçar öndürýän korporasiýalar hem-de gorag şlýapalaryny we saýawanlaryny öndürijiler bilen hyzmatdaşlyk edýän, Radi-Cool kompaniýasy bilen bilelikde işlenip düzüldi.
Nissan barlag merkeziniň dolandyryjysy Susumu Miura kondisionere düşýän agramyň akkumulýatoryň zarýadyna ep-esli täsir edip biljek elektrikli ulaglar üçin bu işläp taýýarlamanyň möhümdigini aýtdy. Kompaniýa “sowuk boýag” diňe bir syýahatyň rahatlygynyň derejesini ýokarlandyrman, eýsem, energiýany tygşytlamaga we hereketlendirijilere düşýän agramy azaltmaga kömek eder diýip hasaplaýar.
Ýöne munuň birnäçe emmasy hem bar: birinjiden, örtük adatdakysyndan 6 esse galyň bolýar. Ikinjiden, awtoulaglaryň hemmesi ak reňkde bolmaz ýaly, sowadyjy boýag reňksiz, dury bolmaly. Üçünjiden, düzüminiň üýtgeşikdigi sebäpli, boýagy sepmek usuly bilen çalyp bolmaýar. Ony walik bilen çalmaly bolýar, munda material has köp gidýär we örtügi gyradeň galyňlykda edip bolmaýar.
Şeýle-de bolsa, Nissan bu boýagy ulanmagyň, esasanam, günüň köp bölegini Günüň aşagynda geçirýän awtoulaglara, ýük ulaglaryna we tiz kömek ulaglaryna uly haýrynyň degjekdigini görýär. Kompaniýa häzirki wagtda Tokionyň Haneda howa menziliniň üstünden geçýän, kölegesi az bolan ýerlerde boýagy barlap görýär.
