Nissan kompaniýasy Takayama Group bilen hyzmatdaşlykda boýag önümçiliginiň galyndylaryny gurluşyk senagaty üçin ses izolirleýji materiallara gaýtadan işlemäge başlady.
Kompaniýanyň metbugat beýanatyna görä, Nissan-yň zawodlarynda ýygnanýan kalsiý karbonaty TS-12 we TS-20 ses izolirleýji listlerini öndürmekde ulanylýar.
Bu material "gurak kamera" diýip atlandyrylýan boýamak prosesini ulanýan Tochigi we Oppama zawodlarynda öndürilýär. Boýag bölejikleriniň akar suwlara düşüp, senagat galyndylaryna öwrülýän däp bolan ulgamlardan tapawutlylykda, munda artykmaç boýag kalsiý karbonat süzgüçlerinde süzülip galýar. Netijede, soňra ulanmaga ýaramly gaty goşmaça önüm emele gelýär.
Nissan bu täze çemeleşmäniň galyndylaryň möçberini ýylda takmynan 1200 tonna we zyňyndylary utilizasiýa etmegiň çykdajylaryny takmynan 25 million iýen azaltjakdygyny çaklaýar.
Şeýle hem, kompaniýa ses izolirleýji listleriň däp bolan önümlere garanyňda CO₂-iň zyňyndylaryny 30%-den gowrak azaldýandygyny mälim etdi. Önümler Takayama Kasei tarapyndan öndürilýär we Taiho kompaniýasy tarapyndan satylýar.
Nissan gaýtadan işlenen kalsiý karbonatynyň başga ulanylyşlaryny hem öwrenýär. Has takygy, kompaniýa bu materialy 2030-njy ýyla çenli awtoulag böleklerinde ulanmagyň mümkinçiligini öwrenýär.
