“Diňlemek” (“Прослушка”), “Lýuter” (“Лютер”) we “Tor” (“Тор”) filmlerindäki keşpleri bilen tanalýan aktýor Idris Elba Zanzibarda kinostudiýa açar diýip, BBC habar berýär.
Elba eýýäm Tanzaniýa arhipelagynda bir ýer satyn alyp, Tanzaniýanyň prezidenti Samia Suluhu Hasandan resmi taýdan rugsat aldy. Zanzibaryň Maýa goýumlar ministriniň sözlerine görä, täze studiýa Golliwud, Nolliwud we Bolliwud ýaly bolar.
Şeýle hem ministr studiýanyň näme diýip atlandyryljakdygynyň entek belli däldigini aýtdy.
Ministr Zanzibar halkara film festiwalynda pudak işgärleriniň öňünde eden çykyşynda: "Biziň muny Zanzibarda nähili atlandyrjagymyz – Zolliwud diýmelimi ýa-da Zawud – entek belli däl" diýip degişdi.
Prezident Samia 2023-nji ýylyň ýanwarynda Şweýsariýada geçirilen Bütindünýä ykdysady forumynda Elba bilen bu taslamany ara alyp maslahatlaşypdy. Prezidentiň metbugat sekretarynyň sözlerine görä, bu taslama diňe bir Tanzaniýada däl, eýsem, gündogar we merkezi Afrikada kino pudagynyň ösmegine kömek eder.
Ene-atasy sierra-leonly we ganaly bolan Elba ozal Ganada kinostudiýa döretmek bilen Afrika kinematografiýasyny ösdürmek baradaky meýilnamasyny yglan edipdi. Aktýoryň sözlerine görä, afrikaly kinematografiýaçylarda zehiniň bardygyna garamazdan, olara serişde ýetmezçilik edýär.
