Awgust aýynyň ortalarynda kuzowy Figoni et Falaschi atelýesinde işlenen, örän seýrek Delahaye 135M rodsteri Gooding&Co auksionyna satlyga çykarylar. Awtoulag bary-ýogy 11 nusganyň biridir we oňa 2-3 million dollar diýip nyrh kesilýär.
Rodster hasap boýunça sekizinji bolup ýasalypdyr we 1938-nji ýylda alžirli telekeçi tarapyndan sargyt edilipdir. Arhiwde 1940-njy ýyllaryň başynda onuň Alžirde bardygyny tassyklaýan suratlar saklanyp galypdyr. Şeýle-de bolsa, 1992-nji ýyla çenli ulagyň soňky ykbaly barada hiç zat belli bolmandyr, diňe 1992-nji ýylda fransuz höwesjeňlerinden biri onuň metal böleklerini satmak bilen meşgullanýan bir adamyň garažynda saklanýandygynyň üstüni açypdyr.
Delahaye 135M, interýeri ýok hem bolsa, deňeşdireňde oňat ýagdaýda ilki Fransiýa, soňra Angliýa eltilip, birnäçe ýyllap dikeldildi. 1997-nji ýylda dikeldiş işleri tamamlanandan soň, awtoulag köpçülige görkezildi.
1999-njy ýyldan bäri Delahaye 135M meşhur amerikan kolleksioneri Robert Petersene degişlidir we wagtal-wagtal onuň muzeýinde sergilenýär. Muzeýiň adyndan hem awtoulag auksiona ýerleşdirildi.
Rodster sürüjisi 116 at güýjüni öndürýän 3,5 litrlik 6 silindrli hereketlendiriji we 4 tizlikli mehaniki korobka bilen enjamlaşdyrylandyr.
