Netflix meşhur koreý serialy “Kalmar oýnunyň” ikinji möwsüminiň çykjak senesini mälim etdi. Premýera şu ýylyň 26-njy dekabryna meýilleşdirilýär. Bu barada platformanyň YouTube-kanalynda ýerleşdirilen tizerden belli boldy.
Wideoda täze ölüm howply ýaryşlara gatnaşyjylar we olary gurnaýjylar görkezilýär, olar “Üç ýyl geçdi. Ýene oýnamak isleýärsiňizmi?” diýen sorag bilen ýüzlenýärler.
Ýöne täzelik şunuň bilen gutarmaýar. Netflix serialyň üçünji, ahyrky möwsüminiň 2025-nji ýylda çykjakdygyny hem anons etdi. Serialy dörediji Hwan Don Hek sýužet barada maglumatlar bilen paýlaşdy. Ýagny, birinji möwsümiň baş gahrymany Son Ki Hun dostlaryny ýitirmegine sebäp bolan ganly oýunlary gurnaýjylardan ar almakçy bolýar.
Ýatlap geçsek, “Kalmar oýnunyň” birinji möwsümi Netflix-de 2021-nji ýylyň 17-nji sentýabrynda görkezildi we global hadysa öwrüldi. Seriala 28 günde tomaşa üçin 1,65 milliard sagatdan gowrak wagt sarp edildi. Şeýle-de, şou 111 mln akkauntdan geçdi we Netflix-iň taryhynda iň köp tomaşa edilen serial boldy.
