Hytaýyň 54 ýaşly, Sýuý familiýaly ýaşaýjysy iki ýyl bäri üsgülewükden ejir çekýän eken. Köp sanly barlaglara we berlen bejergilere garamazdan, lukmanlar onuň keseliniň sebäbini anyklap bilmändirler.
Ahyrynda, öýken skanirlemesinden soň, ol adamda bir santimetr töweregi ösüntginiň bardygy anyklanypdyr. Çiş bardyr diýip çaklan lukmanlar operasiýa etmek kararyna gelipdirler.
Emma South China Morning Post gazetiniň ýazmagyna görä, operasiýa wagtynda üsgülewigiň sebäbiniň asla rak däl-de, hassanyň sag öýkenine çili burçunyň bir böleginiň dykylyp galandygy ýüze çykypdyr.
Soň görlüp oturylsa, iki ýyl ozal Sýuý nahar iýip otyrka düwnügipdir, megerem, şonda burçuň bir bölegi onuň dem alyş ýoluna düşen bolmaly.
Lukmanlar bu tapyndy üýtgeşik hem bolsa, birinji gezek duş gelýän waka däldigini bellediler. Olar iş ýüzünde öýkeninden haýwan süňküniň, diş proteziniň we hatda gulakhalkanyň bölekleri çykan näsaglara hem duş gelipdirler.
