Ýaponiýanyň milli ýygyndysy dördünji ýaryş güni tamamlanandan soň Parižde dowam edýän Olimpiadanyň medal sanawynda öňdeligini saklady. 30-njy iýulda dzýudoçy Takanori Nagase 81 kg çenli agram derejesinde altyn medal gazanyp, Ýaponiýanyň medal sanyny 13-e ýetirdi: ýedi altyn, iki kümüş we dört bürünç.
Hytaýyň milli ýygyndysy alty altyn, alty kümüş we iki bürünç medal bilen ikinji orna çykdy. Üçünji orny alty altyn we dört kümüş medal bilen Awstraliýanyň topary eýeleýär. ABŞ umumy medal sany boýunça öňde barýar (20), ýöne olardan diňe üçüsi altyn.
Gyzykly wakalar:
Stend atyşygy: Wenesueladan 60 ýaşly atyjy Leonel Martines ýaryşyň iň uly ýaşly gatnaşyjylarynyň biri boldy. Onuň üçin bu ikinji Olimpiada, ýöne birinji Olimpiadasyna kyrk ýyl mundan ozal – 1984-nji ýylda gatnaşdy. Şol Oýunlardan soň Martines sporty taşlap, biznes bilen meşgullandy, ýöne 2010-njy ýyllaryň başynda gaýdyp gelmek kararyna geldi. 30-njy iýulda geçirilen stend atyşygy boýunça ýaryşda Martines 28-nji orny eýeledi.
Gylyçlaşma: Müsürden gylyçlaşma boýunça zenan türgen Nada Hafez Pariždäki Olimpiadada hamylalygynyň ýedinji aýynda çykyş etdi. “Meýdançada iki gatnaşyjy bar ýalydy, ýöne hakykatda olar üçdi. Men, meniň garşydaşym we heniz dünýä inmedik çagam” – diýip, Hafez habar berdi. Onuň hamyladygyny hatda onuň tälimçisi hem aňmandyr. Müsürli Olimpiýa ýaryşynda 1/8 finala çykyp, Günorta Koreýanyň wekilinden utuldy.
Tennis: Ispaniýalylar Rafael Nadal we Karlos Alkaras Olimpiýa ýaryşynda jübüt görnüşde ikinji tapgyr oýunda ýeňiş gazandylar. Olar niderlandlylar Wesli Kolhof bilen Tallon Grikspordan 6:4, 6:7 (2:7), 10:2 hasabynda üstün çykdylar. 1/4 finalda olar amerikalylar Rajiw Ram bilen Ostin Kraýçeka garşy oýnarlar.
Gimnastika: ABŞ-nyň sport gimnastikasy boýunça zenanlar ýygyndysy toparlaýyn ýaryşda altyn medal gazandy. Toparyň agzalarynyň biri Simona Baýlz bäşinji gezek Olimpiýa çempiony boldy.
Regbi: Täze Zelandiýanyň zenanlar ýygyndysy finalda Kanadany 19:12 hasabynda utup, altyn medal gazandy.
