Braziliýaly sýorfingçi Gabriel Medina 2024-nji ýylyň Olimpiýa oýunlarynda erkekleriň arasynda geçirilen sýorfing ýaryşynda täze Olimpiýa rekordyny goýdy. Türgen diňe bir tolkunlaryň däl, eýsem sosial ulgamlaryň-da gahrymany boldy diýip, The Athletic habar berýär.
Bu Olimpiýa dissiplinasy boýunça ýaryşyň tapawutly aýratynlygy onuň Parižden 15 müň kilometr uzaklykdaky Taitide geçirilýänligidir. Taiti Fransiýanyň deňiz aňyrsyndaky sebitleriniň biridir.
Medina ýeke tolkun üçin 10 baldan 9,90 bal gazandy, bu öň hiç kime başartmandy. Bu üstünlik braziliýaly türgene ýaryşlaryň dörtden bir finalyna çykmaga mümkinçilik berdi.
AFP fotografy Žerom Bruýe Medinanyň rekordyny baýram edişini surata düşürip, özboluşly pursaty tutmaga ýetişdi. Suratda Medina we onuň sýorfing tagtasy suwuň üstünde howada gaýýar, türgen bolsa sag eliniň süýem barmagyny ýokary görkezýär. Bruýe bu suraty beýleki fotograflar bilen gaýykda wagty düşürdi.
Surat sosial ulgamlarda derrew ýaýrady we eýýäm Olimpiada-2024-üň iň esasy suratlarynyň biri hökmünde ykrar edildi.
Belläp geçsek, sýorfing ýaryşy ilkinji gezek Tokiodaky Olimpiada-2020-de geçirildi.
