19-njy awgustda Aşgabatda “Kids Ekspo: ähli zat çagalar üçin” atly halkara sergi ýarmarkasy geçiriler. Anna güni geçirilen Hökümet mejlisinde wise-premýer B.Atdaýew sergi ýarmarkasyny geçirmäge görülýän taýýarlyk barada hasabat berdi.
Sergi ýarmarkasynda ýurdumyzyň we daşary ýurtlaryň öňdebaryjy haryt öndürijileriniň çagalar, okuwçylar, talyplar üçin harytlaryny, ýokary hilli, ekologik taýdan arassa önümleri, okuw esbaplaryny, elektron harytlary hödürlemek göz öňünde tutulýar.
Şunuň bilen birlikde, pudakda iş alyp barýan kompaniýalaryň tejribe alyşmagy, çagalar üçin ussatlyk sapaklarynyň, bäsleşikleriň guralmagy, meşhur Modalar öýleriniň çagalar üçin täze lybaslarynyň dabaraly görkezilişini guramak meýilleşdirilýär.
Serdar Berdimuhamedow 19-njy awgustda paýtagtymyzda geçiriljek sergi ýarmarkasyna Türkmenistanyň we daşary ýurtlaryň öňdebaryjy haryt öndürijileriniň gatnaşmagyny üpjün etmegiň zerurdygyny belläp, wise-premýere bu halkara sergini guramaçylykly geçirmäge gowy taýýarlyk görmegi tabşyrdy.
