Toyota 2025-nji ýylda modeli täzeläninde meşhur RAV4-i[ formulasyny saklamagy meýilleşdirýär. Kompaniýa öwrülişikli üýtgeşmeleriň ýerine strategiki gowulaşmagy saýlap, dizaýny we işleýşini düýpgöter üýtgetmegi niýet edinmeýär diýip, Carscoops ýazýar.
Toyota Motor North America awtoulag bölüminiň başlygy Endrýu Jillend RAV4-i Camry bilen deňeşdirip, ykjam wnedorožnigiň satuw nukdaýnazaryndan kompaniýanyň “täze Camry”-si bolandygyny aýtdy. Camry meşhurlygyny ýitirse-de, beýleki tarapdan RAV4 gowy netije görkezmegini dowam etdirýär. 2024-nji ýylyň birinji ýarymynda RAV4 Toyota-nyň ABŞ-daky satuwynyň dörtden bir bölegini emele getirdi we elektrikleşdirilen görnüşleriniň paýy 52% -e ýetdi.
Eger wnedorožnik alyjylary şol bir depginde özüne çekmegi dowam etdirse, 2019-njy ýyldaky iň ýokary derejesinden – 448 071 birlikden ýokary bolup, şu ýyl 500 000 ulagyň satylmagyny gazanyp biler. 2023-nji ýylda RAV4 1 075 million birligi bilen dünýäde iň köp satylan ikinji ulag boldy.
Toyota Motor North America -nyň önümi meýilnamalaşdyryş bölüminiň başlygy Kuper Eriksen: “Toyota müşderileriň isleglerini kanagatlandyrýan RAV4-iň ýeňiji adyny ýitirmek islemeýär” -diýdi.
RAV4-iň täze nesli üçin meýilleşdirilen üýtgeşmeler dizaýny döwrebaplaşdyrmagy, zyňyndy standartlaryna we beýleki öndürijiler bilen bäsdeşlige laýyklygy öz içine alar, ýöne düýpli häsiýete eýe bolmaz.
Toyota-nyň dilerleri köp sanly müşderini özüne çekýän we kompaniýanyň esasy ulaglaryndan biri bolmagynda galýan RAV4-e ýokary baha berýärler.
