Samsung kompaniýasy, Galaxy Ring akylly ýüzüklerine sargytlaryň köpelmegi bilen olaryň önümçiligini bir milliona çenli artdyrmak kararyna geldi.
Kompaniýa ilki 400 000 ýüzük öndürmegi meýilleşdirdi. Ýöne indi ýylyň ahyryna çenli üpjün edijilerden ýene 600 000 ýüzük öndürmegi talap edýär.
Kompaniýa Galaxy Ring-iň diňe Samsung Galaxy smartfonlary bilen däl-de, beýleki Android enjamlary bilen hem işlejekdigini tassyklady. Ýüzügiň işlemegi üçin Android 11 we azyndan 1,5 GB ýat gerek.
Insaýderler kompaniýanyň iOS üçin hem goldaw goşmagy meýilleşdirýändigini habar berýärler. Ýöne başlangyç satuwda bu goldaw ýokdy.
400 dollar bahasy bolan Galaxy Ring dürli saglygy yzarlaýyş funksiýalaryny we diňe Samsung Galaxy enjamlarynda elýeterli bolan Find My Ring funkiýasyny hödürleýär.
Galaxy Ring-iň satuwy eýýäm başlandy we Samsung aýda 200 000 ýüzük satmagy meýilleşdirýär. Eger kompaniýa muny başarsa, Galaxy Ring-iň satuwy, häzirki wagtda Samsung-yň garşysyna kazyýet işini alyp barýan Oura akylly ýüzüginiň üç nesliniň satuwyndan has köp bolar. Günorta Koreýanyň tehnologiýa ägirdi Kaliforniýanyň kazyýetinde Ouranyň patentlerini bozmaýandygyny tassyklamak isleýär.
Ozal Samsung enjamy ulanmak üçin birnäçe teklip beripdi. Kompaniýa "ýüzük dakýan eliňizde magnit ýa-da magnit elementini saklasaňyz, ädim sanamak ýaly käbir funksiýalaryň kadaly işlemezligi" barada duýduryş berdi.
