Türkmenistandan dört sany talyp gyz "ABŞ-nyň institutlaryny öwreniş" (SUSI) maksatnamasyna gatnaşdylar.
Öňdebaryjy talyplar üçin bäş hepdelik akademiki maksatnama 21-nji iýundan 26-njy iýul aralygynda amerikan ýokary okuw mekdepleriniň binýadynda geçirilýär. Dalaşgärleri seçip almak netijesinde maksatnama gatnaşmak hukugyna Oguz han adyndaky Inžener-tehnologiýalar uniwersitetinden iki talyp - Gurbangül Sapargeldiýewa (biotehnologiýa we ekologiýa fakulteti) we Çynar Garlyýewa (kiberfiziki ulgamlar fakulteti), şeýle hem Türkmenistanyň DIM-niň Halkara gatnaşyklary institutyndan iki talyp - Ýupar Egirjäýewa (halkara ykdysady gatnaşyklar fakulteti) we Akgözel Rasulowa (halkara gatnaşyklary fakulteti) gazandy.
Maksatnama ABŞ-nyň medeniýetini, taryhyny we jemgyýetini öwrenmekligi çuňlaşdyrmaga, şeýle hem liderlik başarnyklaryny we medeniýetara gatnaşyklary ösdürmäge gönükdirilendir. Maksatnama gatnaşyjylar zähmetiň taryhy, bilim maksatnamalaryny işläp düzmek bilen bagly temalary öwrenýärler.
Bäş hepdäniň dowamynda talyp gyzlar interaktiw sapaklara, diskussiýalara, umumy sapaklara we workşoplara gatnaşýarlar. Olar şeýle hem ABŞ-nyň dürli desgalaryna we sebitlerine baryp görýärler.
