2024-nji ýylyň 21-nji iýuly howa gözegçilikleriniň taryhynda iň yssy gün boldy. Howanyň üýtgemegi boýunça Copernicus gullugy bu maglumaty tassyklaýar. Copernicus 1940-njy ýyldan bäri global howa şertlerini yzarlaýar.
Geçen ýekşenbe güni dünýädäki ýerüsti howanyň ortaça temperaturasy 17.09 gradusa ýetdi. Bu görkeziji, geçen ýylyň iýun aýynda bellenilen rekorddan (17,08) ýokarydyr.
Ýylylyk tolkunlary ABŞ-ny, Ýewropany we Russiýany gurşap aldy diýip, Reuters habar berýär. Copernicus-yň müdiri Karlo Buontempo, ýylylyk tolkunlarynyň bütin dünýäde ýaýramagy sebäpli şu hepdäniň başynyň ýekşenbe gününden has yssy bolup biljekdigini aýtdy.
Alymlar howanyň üýtgemegini, gazylyp alynýan ýangyçlaryň ýakylmagy bilen baglanyşdyrýarlar. 2023-nji ýylyň iýun aýyndan başlap, her aý geçen ýyllardaky aýlar bilen deňeşdirilende tayhdaky iň yssy aý bolýar.
Hünärmenler 2024-nji ýylyň temperatura nukdaýnazaryndan 2023-nji ýyldan geçip biljekdigini çaklaýarlar. Howanyň üýtgemegi we aprel aýynda tamamlanan El-Nino hadysasy temperaturanyň gün-günden ýokarlanmagyna sebäp bolýar.
