Presti fransuz başlangyjy öndürijileri adaty surata düşüriş çykdajylaryndan halas edip, interýeriň mebel bilen bezelen hakyky şekillerini döretmäge mümkinçilik berýän, generatiw emeli aňa esaslanýan guraly işläp taýýarlady.
Taslamanyň awtorlarynyň sözlerine görä, Presti önümleriniň wizual şekillerini döretmek üçin ummasyz pul sarp edýän mebel öndürijiler üçin amatlydyr. Üýtgedilen Stable Diffusion XL modelini ulanyp, gural mebeliň şekilini içeriniň hakyky suratyna takyk jikme-jiklikler bilen birleşdirmäge mümkinçilik berýär.
Onda müşderiler diňe bir fon saýlap bilmek bilen çäklenmän, ýassyk ýaly esbaplary hem goşup, mebeliň reňkini, hatda materiallaryny hem üýtgedip bilerler. Presti geljekde daş-töweregiň gurluşyny we materiallaryny üýtgetmek ukybyny goşmagy wada berýär.
Presti-niň esaslandyryjysy we baş direktory Nabil Tumi: "Bu modeli 75 000 sany ýokary hilli mebeliň suratlaryny ulanyp taýýarladyk, bu bolsa onuň işini hut şu kategoriýa üçin optimizirlemäge mümkinçilik berdi" – diýip belledi.
Täze gural mebel öndürijilere wizual kataloglary döretmegiň has elýeterli we täsirli usulyny hödürläp, adaty fotosessiýa gidýän wagty we çykdajylary azaldýar.
