2024-nji ýylyň 1-nji awgustyndan başlap, 5-nji sentýabryna çenli ýurdumyzyň welaýatlarynda we etraplarynda, Aşgabat we Arkadag şäherlerinde mekdep harytlarynyň satuw-söwdasy dowam eder. Bu barada wise-premýer B.Atdaýew Hökümet mejlisinde habar berdi.
Bellenilişi ýaly, Söwda we daşary ykdysady aragatnaşyklar ministrliginiň kärhanalary tarapyndan okuw esbaplary, okuwçy we sport egin-eşikleri, aýakgaplar bilen üpjün etmek üçin ýurdumyzyň önüm öndürijileri we haryt getirijiler bilen hyzmatdaşlyk etmek esasynda degişli işler amala aşyrylýar.
Sanly ulgamy ösdürmek we halkymyza döwrebap hyzmatlary ýola goýmak maksady bilen, elektron söwda dükanlarynyň üsti bilen bu harytlary ilatymyza hödürlemek hem-de eltip bermek hyzmatlary ýola goýlar.
Serdar Berdimuhamedow ilatymyzyň dürli görnüşli harytlara bolan isleglerini yzygiderli öwrenip, içerki bazaryň bolçulygyny artdyrmagyň möhüm bolup durýandygyny nygtady.
Täze okuw ýylyna taýýarlyk bilen bagly göçme söwda nokatlaryny guramak hem zerurdyr. Ol ýerde okuwçylar we talyplar üçin zerur bolan harytlar doly üpjün edilmelidir diýip, döwlet Baştutany aýtdy we wise-premýere bu ugurda degişli işleri geçirmegi tabşyrdy.
