16-njy iýulda ABŞ-da Nýu-Ýorkuň we Nýu-Jersiniň ýaşaýjylary adaty bolmadyk bir hadysanyň şaýady boldular: gündizlikde şäheriň üstünden meteorit uçup geçdi.
Diametri 0,3 metrden uly bolmadyk kosmos daşy Nýu-Ýork şäheriniň atmosferasyna girip, Azatlyk heýkeliniň depesinden uçup geçdi, Manhetten şäheriniň merkeziniň ýokarsynda dargap pytrady.
Meteor ýagty saçyp, ýyldyrymyň gümmürdisini ýada salýan gaty ses bilen utgaşykly uçup geçdi. Bilermenleriň baha bermegine görä, meteoryň tizligi sagatda 54 500 km-den 61 200 km aralygyndady.
Wakany wideo alan şaýatlar wideoýazgyny NASA-nyň Meteorit gözegçilik gullugy bilen paýlaşdy. Kosmos gullugynyň habar bermegine görä, meteorlar adatça gijelerine gowy görünýär, şonuň üçin onuň bu gezekki gündizki uçuşy seýrek we ajaýyp hadysa boldy.
Meteor kiçi hem bolsa, onuň täsiri şol wagt Nýu-Ýorkuň yssy howasynda ep-esli aralyga ýaýran ses tolkunynyň döremegine sebäp boldy. Ses tolkunlary, sowuk howadaka garanyňda, maýyl howada has çalt hereket edýär, sebäbi ýokary temperaturaly howanyň molekulalarynda energiýa köp bolýar we çalt titreýär. Staten-Aýlendiň, Brukliniň, Kwinsiň we Nýu-Jersiniň demirgazygynda ýaşaýanlar titreme bilen utgaşyp gidýän gümmürdini eşitdiler.
