Ýewropa parlamenti Ursula fon der Lýaýeniň Ýewrokomissiýanyň başlygy wezipesine dalaşgärligini tassyklady. Bu onuň ikinji bäşýyllyk möhlete gaýtadan saýlanandygyny aňladýar. Oňa 720 deputatdan 401 deputat ses berdi, 284-üsi garşy boldy, 15-isi saklandy diýip, RBK habar berýär.
Ses berişlikden öň eden çykyşynda fon der Lýaýen Ýewropanyň geljegini gurmak we global kynçylyklara garşy durmak üçin tagallalaryny birleşdirmegiň möhümdigini belledi. Ol täze möhlet üçin maksatnamany hödürledi, onda ÝB-niň howpsuzlygyny berkitmek esasy wezipe hökmünde görkezildi.
Şeýle-de, ileri tutulýan ugurlaryň arasynda goranyş senagatyny güýçlendirmek, goranmak boýunça ýewrokomissar wezipesini döretmek we Ýewropa goragynyň geljegi barada ilkinji resminamany işläp taýýarlamak bar. Fon der Lýaýen ÝB-ni geljek bäş ýylda “hakyky goranyş bileleşigine” öwürmegi maksat edinýär.
“Ýewropa häzir saýlawyň öňünde dur. Geljek bäş ýylda işimizi emele getirjek we geljek 50 ýylda dünýädäki ornumyzy kesgitlejek saýlawyň öňünde dur. Saýlaw biziň wakalaryň ýa-da daş-töweregimizdäki dünýäniň täsiri astynda emele gelmegimiz ýa-da biziň birleşip, geljegimizi özbaşdak gurmagymyz bilen baglanyşyklydyr” – diýip, fon der Lýaýen aýtdy.
