Geçen hepde premýerasy bolan “Ýigrenji Men 4” (“Гадкий я 4”) multfilmi ilkinji bäş gününde 230 million dollar girdeji gazandy. Illumination studiýasynyň animasion filmi halkara bazarynda 107 million dollar, ABŞ-da bolsa 123 million dollar gazandy diýip, Variety ýazýar.
Universal Illumination studiýalarynyň multfilm üçin bary-ýogy 100 million dollar çykdajysyny göz öňünde tutanyňda, bu diýseň täsir galdyryjy netijedir. 2024-nji ýylda iň köp girdeji gazanan Pixar we Disney-iň “Tapmaça 2” (“Головоломка 2”) filmi üçin bolsa, iki esse köp - 200 million dollar sarp edilipdi.
“Tapmaça 2”-niň geçen hepdede 30 million dollar gazanandygyny belläp geçeliň. Filmiň umumy girdejisi 1,2 milliard dollara ýetip, ol taryhda iň köp girdeji gazanan bäşinji animasion filmi boldy.
Emma “Ýigrenji men” animasion franşizasyny başga rekord bilen öwüp bolar. Grýu we Minionlar baradaky multfilmler seriýasy taryhda iň köp girdeji gazanan animasion franşizadyr. Onuň girdejisi 4,7 milliard dollara ýetdi (“Şrek” 4 milliard dollar bilen ikinji ýerde durýar). Franşiza üç bölümi, iki spinoffy we birnäçe gysga metražly filmleri öz içine alýar.
Umuman aýdanyňda, kinematografiýa kinostudiýalara gowy girdeji getirýär diýip, Variety ýazýar. Beýleki filmleriň geçen hepdäniň ahyryndaky (5-7-nji iýul) netijeleri muňa şaýatlyk edýär:
- "Garfild" - 60 million dollar býujetinde 241 million dollar girdeji;
- “Maýmynlar planetasynyň şalygy” (“Королевство планеты обезьян”)- 160 million dollar býujetinde 392 million dollar girdeji;
- “Ýaramaz ýigitler ahyryna çenli” (“Плохие парни до конца”) - 100 million dollar býujetinde 360 million dollar girdeji;
- "Ümsüm ýer: Birinji gün" (“Тихое место: День первый”)- 68 million dollar býujetinde 178 million dollar girdeji.
Analitikler “Tüweleý 2” (“Смерчи 2”), “Dedpul we Rosomaha” (“Дэдпул и Росомаха”) we “Keseki: Romul” (“Чужой: Ромул”) ýaly beýleki tomusky blokbasterlerde hem ýokary kassa ýygymlaryny çaklaýarlar.
