Internetde gizlin bazarda (darknetde) ulanyjylaryň ogurlanan 10 milliard töweregi parolynyň maglumat bazalary satuwa çykaryldy. Bu taryhda iň uly parol ýaýradylmasydyr.
RockYou2024.txt diýlip atlandyrylýan bu faýlda soňky ýyllarda dürli haker hüjümleri arkaly alnan 9 948 575 739 parol bar. Hünärmenler bu syzdyrylmanyň maglumat howpsuzlygyna düýpli howp salýandygyny belläp geçýärler, çünki köp adamlar dürli saýtlar we hyzmatlar üçin şol bir parollary ulanýarlar.
Syzdyrylan parollaryň haýsy çeşmelere degişlidigi belli däl, şonuň üçin olary diňe belli bir hasaplara girmek üçin ulanyp bolmaýar. Emma hüjümçilere hasaplary döwmek üçin maglumat bazalaryny gezekli-gezegine ulanmaga hiç zat päsgel bermeýär. Bu usul netijeli bolmasa-da, kompýuterleriň işleýşiniň ýokarlanmagyny we köp adamlaryň ýeňil parollary ulanmagyny göz öňünde tutmak bilen käbir ýagdaýlarda hüjümçiler üçin ähmiýetli bolup biler.
Cybernews-iň hünärmenleri hasaplary (akkauntlary) hakerlerden goramaga kömek etjek birnäçe maslahat berdiler:
- Syzdyrylan parollar bilen baglanyşykly ähli hasaplaryň parollaryny derrew täzeden düzüň. Birnäçe platformada gaýtalanmaýan ygtybarly, adaty bolmadyk parollary saýlamak maslahat berilýär;
- Mümkin boldugyça köp faktorly tassyklamany işjeňleşdiriň. Bu funksiýa paroldan daşary goşmaça tassyklamalary talap edip, howpsuzlygy ýokarlandyrar.
- Çylşyrymly parollary döretmek we saklamak üçin parol dolandyryjy programma üpjünçiligini ulanyň. Parol dolandyryjylary dürli hasaplarda parollary gaýtadan ulanmagyň howpuny azaldýarlar.
