Toyota kompaniýasy meşhur krossower RAV4-i täzelemäge taýýarlanýar. Muny AutoHome portaly tarapyndan neşir edilen modeliň ilkinji yzarlanyp düşürilen suraty subut edýär.
Suratda täze radiator gözenegini, optikany we bamperi öz içine alýan üýtgedilen öň tarapyň dizaýny görkezilýär. Şeýle hem kuzowyň täzelenen yzky sütünleri göze ilýär.
RAV4-üň doly täzelenjekdigi ýa-da diňe gaýtadan işleniljekdigi belli däl. Şeýle-de bolsa, onuň häzirki modeli 2018-nji ýylda peýda boldy, şonuň üçin düýpli täzelenme hakda gürrüň gidýän bolmagy hem ähtimal.
Täze RAV4 häzirki platformasyny saklap, täzelenen hereketlendiriji gammasyny we tehnologiki taýdan has ösen salony alar diýip çak edilýär. Insaýderleriň maglumatlaryna görä, täze modeliň önümçiligi şu ýylyň oktýabr aýynda başlap biler.
RAV4-den başga-da, Toyota ýakyn wagtda täze Selica sport awtoulagyny hödürläp biler. Onuň 2025-nji ýylda GR86 bilen Supra modelleriniň aralygynda peýda bolmagyna garaşylýar.
