Amerikanyň Birleşen Ştatlarynyň Türkmenistandaky ilçisi Metýu S.Klimou ABŞ-nyň wekili hökmünde öz işini tamamlap, şu gün Aşgabatdan ugrady. Ol 2019-njy ýylyň iýun aýyndan bäri bu wezipede işledi diýip, ABŞ-nyň Aşgabatdaky ilçihanasynda TmCars-a habar berdiler.
Ilçi Klimowyň ýolbaşçylygynda Amerikanyň Birleşen Ştatlary we Türkmenistan metan zyňyndylaryny azaltmak arkaly howanyň üýtgemegine garşy göreşmek, halkara zähmet standartlarynyň kabul edilmegini öňe sürmek, söwda we daşary ýurt maýa goýum gatnaşyklaryny giňeltmek, bilim we medeni alyş-çalyşlary berkitmek we Türkmenistanyň baý medeni mirasyny gorap saklamak ýaly köp ugurlarda üstünlikli hyzmatdaşlyk etdi.
Ilçi soňky bäş ýylyň dowamynda ABŞ-nyň Prezidentine we amerikan halkyna wekilçilik etmegiň onuň üçin adatdan daşary hormatdygyny belleýär.
“Hyzmatdaşlygymyzyň Ýüpek ýolunyň gadymy ýerlerini dikeltmäge, howanyň üýtgemegine garşy göreşmäge, sebit howpsuzlygyny berkitmäge, daşary ýurt maýa goýumlaryny çekmäge we, esasan hem, adamlar bilen gatnaşyklary ýola goýmaga kömek edendigine buýsanýaryn. Aýalym bilen bilelikde Türkmenistanyň hoşniýetli hem jomart adamlary bilen eden gatnaşyklarymyz bizde ömrümiziň ahyryna çenli hazyna ýaly saklanjak ýatlamalary galdyrdy” - diýip, Klimou belleýär.
Ilçihanada bellemeklerine görä, ilçi Klimou mundan soňra Döwlet Departamentinde we NATO-da ýokary wezipelerde, şeýle hem ABŞ-nyň goşunynda serkerde hökmünde işlän döwrüni hem öz içine almak bilen elli ýyl dowam eden döwlet gullugy karýerasyndan hormatly dynç alşa çykar.
Klimowyň gitmegi bilen Işleri wagtlaýyn ynanylan wekiliň wezipesini ABŞ-nyň Aşgabatdaky ilçihanasynyň ýolbaşçysynyň orunbasary Waýda Widugiris ýerine ýetirer.
