NASA Aýa gonuş apparatyny (HuLC) döretmek boýunça ilkinji bäsleşiginiň ýeňijilerini yglan etdi. ABŞ-nyň uniwersitetlerinden bäsleşige 12 topar gatnaşdy we Aý tozany meselesini çözmek boýunça taýýarlan konsepsiýalaryny hödürlediler diýip, IXBT habar berýär.
Miçigan uniwersitetinden “ARC-LIGHT” taslamasyny hödürlän topar bäsleşigiň ýeňijisi boldy we 10 000 dollar möçberinde pul baýragyny aldy. Olaryň işi “howply ýerleri we traýektoriýany seljermek üçin Aýyň üstüni ygtybarly häsiýetlendirmegiň algoritmine” gönükdirilendir.
Ikinji ýeri “HINDER” taslamasy bilen çykyş edip, 5000 dollar pul baýragyna mynasyp bolan Illinoýs uniwersitetiniň topary aldy. Olaryň işläp taýýarlan taslamasy “eroziýany azaltmak üçin nawigasiýa dinamikasynyň toplumlaýyn birleşdirilmegine” degişlidir. Kolorado uniwersitetiniň Boulderdäki topary Lunar Surface Assessment Tool (LSAT): Töwekgelçilikleri derňemek üçin Aý tozanynyň dinamikasyny simulýasiýa etmek taslamasy bilen çykyş edip, üçünji ýeri eýelediler we 3000 dollar möçberinde pul baýragyny aldylar.
Bäsleşik Aýa howpsuz gonulmagyny üpjün etmäge we enjamlary Aý tozanynyň täsirinden goramaga kömek etjek täze tehnologiýalaryň ösdürilmegine goldaw bermek maksady bilen guraldy. NASA bäsleşigiň netijelerini “Artemida” maksatnamasynyň çäginde Aýa iberiljek geljekki missiýalary işläp taýýarlamakda ulanmagy meýilleşdirýär.
Aý tozanynyň howpuny azaltmak geljekki Aý missiýalary üçin möhüm maksatdyr, sebäbi tozan enjamlara, astronawtlaryň saglygyna zeper ýetirip biler. HuLC bäsleşigi arkaly teklip edilen çözgütler NASA-nyň bu kynçylyklary ýeňip geçmegine we adamyň Aýa üstünlikli baryp gelmegini üpjün edip biler.
