81-nji Wenesiýa kinofestiwaly 28-nji awgustdan 7-nji sentýabr aralygynda geçiriler we ony režissýor Tim Býortonyň “Bitljus-2” filmi açar. Bu barada Deadline habar berýär.
Festiwalyň müdiri Alberto Barbera bu filmiň kinematografyň iň belli personažlarynyň biri Tim Býortonyň gaýdyp gelmegini aňladýandygyny, şeýle-de režissýoryň özüniň ussatlygyny we zehinini tassyklaýandygyny belledi.
“Men muňa diýseň begenýärin. Meniň üçin Wenesiýa kinofestiwalynda bu filmiň global premýerasy köp zady aňladýar” – diýip, Býorton aýtdy.
“Bitljusyň” birinji bölümi 1988-nji ýylda çykdy. Filmiň dowamynda Dits maşgalasy betbagtçylykdan soň ýene-de Winter-Riwer jaýyna gaýdyp gelýär. Bitljus tarapyndan henizem yzarlanýan Lidiýanyň durmuşy, ýetginjek gyzy Astrid üçekde şäheriň syrly modelini tapyp, tötänleýin o dünýä portaly açandan soň, başdanaýak üýtgeýär.
Bitljusy ýene-de Maýkl Kiton ýerine ýetirer, Waýnona Raýder bolsa Lidiýanyň roluna gaýdyp geler. Şeýle-de, filmde Ketrin O’Hara, Jastin Teru, Monika Belluççi, Artur Konti, Jenna Ortega we Willem Defo peýda bolar.
Film 4-nji sentýabrda halkara prokatyna çykar.
“Bitljusdan” başga-da, Tim Býorton “Edward gaýçy elleri” (Эдвард руки-ножницы, 1990), “Uly balyk” (Крупная рыба, 2003), “Çarli we şokolad fabrikasy” (Чарли и шоколадная фабрика, 2005), “Alisa täsinlikler ýurdunda” (Алиса в Стране чудес, 2010) we “Uly gözler” (Большие глаза, 2014) ýaly filmler bilen hem bellidir.
