Microsoft täze Surface Pro 11 we Surface Laptop 7 noutbuklarynyň abatlanylyşyny ep-esli gowulandyrdy.
Gajetleri derňemek we olaryň abatlaýyşa ýaramlylygyna baha bermek işleri bilen tanalýan iFixit-iň hünärmenleri Microsoft-yň täze önümlerine mümkin bolan 10 baldan 8 bal berdiler. Bu häzirki zaman inçe noutbuklarynyň arasynda alnan iň ýokary baldyr. Bu Apple-iň enjamlarynyň görkezijilerinden iki esse ýokarydyr.
Üstünligiň syry nämede?
Hakykatda, Microsoft SSD we batareýa ýaly, esasy komponentlere girmegi aňsatlaşdyrdy. SSD-ni aýyrmak kyn däl we Surface Laptop 7-niň batareýasyny aýyrmak üçin bolsa diňe arkasyndaky gapagyny açaýmaly.
Mundan başga-da, içerki böleklerde ýerleşen QR kodlar, nurbatlar we zerur gurallar baradaky maglumatlar bilen birlikde, abatlaýyş üçin jikme-jik görkezmeleri bolan Microsoft web sahypasyna eltýär.
