Porsche kompaniýasy öňdäki tormoz şlanglary sebäpli satylan Taycan elektrik ulaglarynyň hemmesini yzyna çagyrýandygyny mälim etdi. AutoCar-yň ýazmagyna görä, yzyna çagyryş dünýä boýunça 150 000-den gowrak ulaga, şol sanda 2025 modeline hem degişlidir.
Kemçilik tormoz suwuklygynyň syzmagyna we tormozyň işleýşiniň peselmegine sebäp bolup biljek tormoz şlanglarynyň çat açmak ýa-da ýarylmak töwekgelçiligi bilen baglydyr.
Kemçiligiň ulaglaryň 1%-inden hem az bölegine degişli bolýandygyna garamazdan, Porsche müşderileriniň howpsuzlygyny üpjün etmek üçin, satylan ähli Taycan-lary yzyna çagyrmak kararyna geldi. Näsaz şlangly ulaglaryň eýelerine olary mugt çalyşmak üçin söwda dellallaryna ýüz tutmak barada habar iberiler.
Kemçilikli ulaglaryň dolandyryş panelinde duýduryş çyrasy gyrpyldaýar. Kompaniýa modeliň eýelerine duýduryş çyrasy doly ýanan dessine ulag sürmegi bes etmegi we derrew söwda dellaly bilen habarlaşmagy maslahat berýär.
Porsche meseläni çözmek üçin eýýäm täze tormoz şlangynyň gurluşyny işläp düzdi. Bu eýýäm Taycan-yň 2024-nji ýylda ikinji gezek yza çagyryşydyr. Maý aýynda kompaniýa ýangyn döremek töwekgelçiligi sebäpli ulaglaryň uly bolmadyk toparyny yzyna çagyrypdy.
