Blue Origin we United Launch Alliance (ULA) kompaniýalary ABŞ-nyň Federal raýat awiasiýasy müdirligine (FAA) Florida ştatyndaky Kennedi adyndaky Kosmos merkeziniň uçuş toplumyndan Ilon Maskyň SpaceX kompaniýasynyň Starship raketasynyň uçurylyşynyň sanyny çäklendirmekligi talap edýän resminamalary tabşyrdy.
SpaceX-iň gönüden-göni bäsdeşi Jeff Bezosyň (Amazon-yň eýesi) Blue Origin kompaniýasy bortunda suwuk metanyň köp bolmagy sebäpli äpet Starship raketasynyň goňşy meýdançalara we golaýdaky raýat desgalaryna howp salýandygyny nygtady. Görkezilen ýygylykdaky uçuşlar bilen bilelikde ýollaryň ýapylmagy, degişli şäherleriň arasynda ulaglaryň hereketi üçin betbagtçylyk bolar.
Mundan başga-da, Tehasda Starship toplumynyň ilkinji synag goýberilişinde uçuş panelini örtýän beton bölekleri goňşy şähere ýetipdi we şeýle hadysalar sebäpli adamlaryň ýaralanmagy mümkin diýip, Blue Origin belleýär.
ULA (Lockheed Martin-iň we Boeing-iň golçur kompaniýasy) hem öz gezeginde goňşy uçuş meýdançalaryna abanýan howpdan başga-da, onuň daşky gurşawa ýetirýän zyýanyny görkezýär.
SpaceX Kennedi adyndaky Kosmos merkezindäki 39A meýdançany ýylda Starship-i 44 gezek uçurmak üçin ulanmagy meýilleşdirýär. Blue Origin we ULA munuň gaty köpdügini aýdýarlar we FAA-dan rugsat berlen uçuşlaryň sanyny azaltmagyny haýyş edýärler.
Ilon Mask bäsdeşleriniň hereketini jogapsyz goýmady.
“O diýen hakyky däl resminama. SpaceX-iň ösüşine kanuny ulanyp badak atjak bolmak, päsgel bermäge synanyşyk (üçünji gezek) ýaly, olara gelişmejek hereket"-diýip, ol özüne degişli sosial ulgamda ýazdy.
