Angliýanyň milli ýygyndysy goşmaça goşulan 30 minutda 2:1 hasabynda Slowakiýany ýeňip, Ýewro-2024-üň 1/4 finalyna çykdy.
Gelzenkirhende geçirilen duşuşykda ilkinji bolup hasaby 25-nji minutda slowakiýalylardan Iwan Şrans açdy. Iňlisler ikinji ýaryma goşulan goşmaça minutlarda (90+5) hasaby deňläp bildiler. Üstaşyr goly Jud Bellingem geçirdi. Angliýa üçin bu urgy tutuş oýnuň dowamynda derwezäniň içine tarap urlan ilkinji urgy boldy.
Goşmaça goşulan 30 minudyň ilkinji minudynda Harri Keýn ýeňiş goluny geçirdi.
Çärýek finalda Angliýa 6-njy iýulda Dýusseldorfda Şweýsariýa bilen duşuşar. Öz gezeginde, Şweýsariýa Ýewropanyň häzirki çempionlary italýanlary ýaryşdan çykardylar (2:0).
1/8 final tapgyrynyň beýleki duşuşygynda Kýolnda Ispaniýa Gruziýany 4:1 hasap bilen utdy.
Gruziýaly futbolçylar 18-nji minutda hasaby açdylar. Ispaniýadan goragçy Roben Le Norman öz derwezesine gol geçirdi. Ispaniýa üçin bu gol şu gezekki ýaryşda ilkinji gezek geçirden goly boldy.
Ispaniýa birinji ýarymda Rodriniň tagallalary bilen hasaby deňledi (39-njy minut). Ikinji ýarymda ispaniýalylar üç gol geçirdiler: Fabian Ruis (51), Niko Uilýams (75) we Dani Olmo (83).
Çärýek finalda 5-nji iýulda Ispaniýa Ştutgartda Germaniýa bilen duşuşar. Ýer eýeleri 1/8 finalda 2:0 hasabynda Daniýadan üstün çykdylar.
