Madridiň «Realy» ýakyn ýyllar üçin özüniň ýolbaşçysyny kesgitledi. Florentino Peres prezidentlik saýlawlarynda ýeňiş gazanyp, dünýäniň iň abraýly futbol klublarynyň biriniň başlygy wezipesini saklap galdy.
Şunlukda, «Patyşalyk klubunyň» köpýyllyk ýolbaşçysy täze ynam mandatyna eýe boldy we azyndan 2030-njy ýyla çenli toparyň strategik ösüşini kesgitlemegi dowam etdirer.
Ses berişligiň netijelerine görä, Peres saýlawlara gatnaşanlaryň 64%-inden gowragynyň goldawyny alyp, öz bäsdeşi Enrike Rikelmeden ynamly öňe geçdi. 79 ýaşly funksioner üçin bu eýýäm yzygiderli sekizinji prezidentlik möwsümidir. Şeýle durnuklylyk bütindünýä futbolynyň ölçegleri boýunça hem seýrek duş gelýän waka bolup, Peresiň «Realyň» döwrebap taryhyna ýetirýän täsirini aýdyň görkezýär.
Bu gezekki saýlaw möwsümi janköýerleriň we köpçülikleýin habar serişdeleriniň aýratyn üns merkezinde boldy. Dalaşgärleriň ikisi hem klubuň geljekki ösüşi barada öz garaýyşlaryny hödürledi.
Aýratyn-da, Žoze Mourinýunyň yza gaýdyp gelmek ähtimallygy baradaky gürrüňler uly gyzyklanma döretdi. Ozal, eger saýlawlarda Peres ýeňiş gazansa, portugaliýaly hünärmeniň ýene-de madridlileriň tälimçilik kürsüsine geçip biljekdigi barada maglumatlar peýda bolupdy. Häzirki wagtda bu habarlara resmi tassyklama ýok hem bolsa, bu tema barada janköýerleriň we bilermenleriň arasynda işjeň gürrüň edilýär.
Klubuň transfer işlerindäki täze habarlar hem seslenme döretdi. Saýlawlar tamamlanmanka, Peres birbada birnäçe meşhur futbolçy bilen şertnama baglaşylandygyny habar berdi. Hususan-da, gürrüň Angliýanyň «Liwerpul» toparynda çykyş eden goragçy Ibraima Konate, şeýle hem Milanyň «Interinden» gaýdan niderlandly gapdal goragçysy Denzel Dumfris barada barýar.
Bu şertnamalar ýolbaşçylaryň toparyň düzümini düýpli täzelemek we ony Ispaniýanyň hem-de Ýewropanyň futbolynyň iň ýokary basgançagyna gaýtaryp getirmek isleýändiginiň alamaty hökmünde kabul edilýär. Geçen möwsümde «Real» Ispaniýanyň çempionatyny ikinji orunda tamamlap, çempionlyk titulyny özüniň baş bäsdeşi bolan «Barselona» aldyrdy.
Madridiň janköýerleri üçin aradaky 8 utuk tapawut has-da agyryly boldy, şonuň üçin hem kümüş medallar seljerişleri we geljekki üýtgeşmeleri geçirmek üçin çynlakaý sebäbe öwrüldi.
Peresiň ýeňşi kluby täzelemek ugrunyň dowam etdiriljekdigini aňladýar. Tejribeli ýolbaşçy uly göwrümli çözgütleri kabul etmäge, infrastruktura maýa goýmaga we dünýä derejesindäki ýyldyzlary çagyrmaga taýýardygyny birnäçe gezek görkezipdi.
Indi prezidentiň öňünde täze wezipe dur — ol hem ikuçly täsirleri galdyran möwsümden soň, kluby ýene-de iň ýokary derejelere çykarmakdyr. Janköýerler diňe bir düzümiň güýçlendirilmegine däl, eýsem toparyň ähli mümkin bolan kuboklar ugrunda göreşe gaýtadan goşulmagyna garaşýar.
