Eýranda 28-nji iýunda geçirilen prezident saýlawlarynyň birinji tapgyrynda prezident saýlamak başa barmady. Çünki dalaşgärleriň hiç biriniň hem alan sesi 50%-den geçmedi diýip, Tasnim we Irib agentlikleri habar berýär.
5-nji iýulda geçirmek meýilleşdirilýän ikinji tapgyra, deslapky maglumatlara görä, 10,4 million adamyň goldawyny alan reformaçy Masud Pezeşkian we 9,4 million adamyň sesini alan konserwator Said Jalili gatnaşar.
Masud Pezeşkian Mejlisiň agzasy, ol prezident Muhammet Hataminiň (2001-2005) ikinji möhlete saýlanan döwründe Eýranyň Saglygy goraýyş we lukmançylyk bilimi ministri bolupdy.
Said Jalili Eýranyň Ruhy Lideriniň Ýokary Milli Howpsuzlyk Geňeşindäki wekili.
Saýlawlara ilkibaşda alty dalaşgär gatnaşdy, ýöne olaryň ikisi - Şehitleriň we weteranlaryň işleri boýunça gaznanyň başlygy Amir-Hoseýin Gazizade-Haşemi we Tähranyň häkimi Alireza Zakani ses berişlikden bir gün öň dalaşgärligini aýyrdylar.
Prezident Ebrahim Raisi maý aýynda uçar heläkçiliginde ýogalandan soň nobatdan daşary prezident saýlawy yglan edildi. Eýranyň Konstitusiýasyna laýyklykda, prezident aradan çykandan soň 50 günüň içinde saýlawlar geçirilmeli. Prezidentiň wezipelerini wagtlaýyn birinji wise-prezident Mohammad Mohber ýerine ýetirýär.
Eýranda prezident Ruhy lider Aýatolla Ali Hameneýiden soň ýurtda iň abraýly syýasatçy hasaplanýar. Prezidentiň borçlaryna Konstitusiýanyň düzgünnamalaryny durmuşa geçirmek we ýerine ýetiriji häkimiýete ýolbaşçylyk etmek girýär. Eýranyň daşary syýasatynyň umumy ugry oňa bagly bolup durýar.
