Çikagodaky Northwestern Medicine hassahanasynda umumy narkoz ulanylmazdan böwrek göçürmesi üstünlikli amala aşyryldy. Bu barada klinikanyň web sahypasynda habar berildi.
Iki sagatdan hem az dowam eden operasiýanyň dowamynda 28 ýaşly Jon Nikolas huşunda boldy. Näsag entek 24 sagat hem doly geçmänkä hassahanadan çykaryldy. Adatça böwregi transplantasiýa edilýän näsaglar operasiýadan soň iki-üç gün hassahanada ýatyp, onsoň çykarylýar.
Operasiýa näsagyň arkasyna urlan we ýerli narkozyň astynda, agyryny aýryjy we rahatlandyryjy derman-däriler ulanylyp geçirildi.
Jon Nikolas 16 ýaşyndan bäri Kron keseli bilen baglanyşykly ýarawsyzlykdan ejir çekýärdi. Operasiýadan öň duzly tagamlary iýmegini çäklendirmäge mejbur bolupdy, çünki artykmaç duz böwrekleriň işine ýaramaz täsir edip biljekdi. 2022-nji ýylda Çikago göçenden soň näsagyň böwreginiň ýagdaýy ýaramazlaşdy we oňa transplantasiýa etdirmek gerek boldy.
Aslynda, ilkibaşda ejesi donor bolmalydy, ýöne döşünden rak keseliniň tapylmagy bilen, muny edip bilmedi. Şondan soň, Jonuň başlangyç synpdan bäri tanaýan dosty donor bolmaga razy boldy.
Hirurglar umumy narkozdan soň gaýra üzülmek töwekgelçiligi bolan näsaglar, akyl-huşunda meselesi bolan ýa-da ýürek-öýken keselli garry adamlar üçin munuň has amatly bolup biljekdigine ynanýarlar.
