Lexus kompaniýasy meşhur ES sedanynyň täzelenen wersiýasyny hödürledi. Düýpli üýtgeşmeler bolmasa-da, öndüriji dörtýyllyk arakesmeden soň Black Line Special Edition wersiýasynyň önümçiligini gaýtadan dikeltdi. ES 350 F Sport Handling modeline esaslanýan Black Line Special Edition modeli gara aýnalara, yzky spoýlere we awtomobiliň bosagasyny bezeýän ýörite öwüşginlere eýe boldy.
Modeliň interýeri 12,3 dýuýmlyk maglumat-güýmenje sistemasy we proeksion displeý bilen üpjün edildi. Beýleki aýratynlyklar panorama görnüşi sistemasyny we SmartAccess açar kartasyny öz içine alýar. Lexus ES 2025 Black Line Special Edition-yň önümçiligi 1000 nusga bilen çäklenýär, baha bolsa 53 615 dollar bolar.
2025-nji ýylyň Lexus ES hatary güýç enjamlarynyň üç görnüşini öz içine alar. Esasy model ES 250 AWD kuwwaty 203 at güýji bolan 2,5 litrlik dört silindrli hereketlendiriji bilen üpjün edildi. ES 350 wersiýasy 302 at güýjüni berýän 3,5 litrlik V6 hereketlendirijisini hödürleýär. Gibrid wersiýa ES 300h bolsa 2,5 litrlik dört silindrli hereketlendiriji bilen üpjün edildi. Onuň umumy kuwwaty 215 at güýjüne barabar.
