Robert Zemekisiň “Bärde” (“Здесь”) filminden ilkinji kadrlar peýda boldy. Taslama “Forrest Gampyň” ýyldyzlaryny – 67 ýaşly Tom Henksi we 57 ýaşly Robin Raýty birleşdirer.
Kadrlarda baş keşpleri ýerine ýetirijiler öz karýeralarynyň başynda ýaly görünýärler. Olaryň gahrymanlaryny ýaşartmak we garratmak effekti üçin grim we sanly tehnologiýalar ulanyldy diýip, Zemekis Vanity Fair bilen söhbetdeşlikde aýtdy. Filmde Henks hem ýetginjek ýaşda, hem 80 ýaşly garry hökmünde görkeziljek Riçard atly adamy janlandyrar.
Sýužet onlarça ýylyň dowamynda är-aýalyň durmuşyny yzarlar. Ähli hereketler bir otagda bolar – şol bir wagtyň özünde kamera hereketsiz ýagdaýda durar. Waka 1920-nji ýyllarda, Riçardyň ene-atasy – El (Pol Bettani) bilen Rouz (Kelli Raýlli) öý guranda başlaýar.
“Görüş nokady tutuş filmiň dowamynda bir, ýöne daş-töwerekdäki zatlar üýtgeýär. Aslynda, şular ýaly zat öň edilmedi. Şeýle sahnalar örän irki sessiz filmlerde bar, şol döwürde “montaž dili” heniz oýlanyp tapylmandy. Umuman, bu töwekgelçilikli iş” diýip, Zemekis aýdýar.
Film Riçard MakGuaýryň 2014-nji ýyldaky grafiki romanyna esaslanýar. Ssenariýany “Forrest Gampyň” üstünde işlän Erik Rot adaptirledi.
ABŞ-da “Bärde” filminiň premýerasy 15-nji noýabra meýilleşdirilýär.
