Futbol boýunça Ýewropa çempionatynyň toparlaýyn tapgyrynyň netijesi boýunça Awstriýa Niderlandlary utup, D toparçada birinji orundan 1/8 finala çykdy. Berlindäki Olimpiýa stadionynda geçirilen oýun Ralf Rangnikiň toparynyň peýdasyna 3:2 hasabynda tamamlandy.
Awstriýalylardan Romano Şmid (59-njy minut) we Marsel Zabitser (80) tapawutlandy. Ýene bir goly Niderlandlaryň oýunçysy Doniell Malen 6-njy minutda öz derwezesine girizdi.
Niderlandlar oýnuň dowamynda Kodi Gakponyň (47) we Memfis Depaýyň (75) gollary bilen hasaby deňläpdiler.
Toparçanyň beýleki bir oýnunda Fransiýa Polşa bilen deňme-deň (1:1) oýnady.
Dortmunddaky oýunda iki gol hem penaltiden geçirildi. Kilian Mbappe 56-njy minutda hasaby açdy, Robert Lewandowskiý 79-njy minutda hasaby deňledi. Polşaly ikinji synanyşykda gol girizdi – birinji 11 metrlik urgyny derwezeban yzyna gaýtardy, ýöne ol derwezäniň liniýasyndan çykdy, şonuň üçin penalti gaýtadan uruldy.
Awstriýanyň we Fransiýanyň milli ýygyndylary göni pleý-off-a çykdylar. Niderlandlar üçünji orundan 1/8 finala saýlandylar.
Awstriýalylar F toparçada ikinji topar bilen oýnarlar, aýgytly oýun 26-njy iýunda geçiriler.
Fransiýanyň garşydaşy E toparçadaky ikinji topar bolar (çarşenbe güni kesgitlener).
D toparçada jemleýji ýagdaý:
- Awstriýa (6 utuk)
- Fransiýa (5)
- Niderlandlar (4)
- Polşa (1).
C toparçada Angliýanyň milli ýygyndysy Kýolnda Sloweniýa bilen deňme-deň (0:0) oýnady we birinji orny eýeledi. Şeýle-de, Serbiýa Mýunhende Daniýa bilen deňme-deň (0:0) oýnady.
Angliýa toparçada birinji orundan pleý-offa çykdy.
Daniýalylar Sloweniýa bilen birmeňzeş utuk gazandylar (her biri 3 utuk). Ýöne Daniýa FIFA-nyň reýtinginde ýokarda ýerleşýändigi üçin ikinji orny eýeledi. Sloweniýaly futbolçylar üçünji orundan pleý-offa saýlandylar.
1/8 finalda Daniýa 29-njy iýunda Dortmundda Germaniýa bilen oýnar. Angliýanyň garşydaşy toparçada üçünji orny eýelän dört toparyň biri bolar.
Horwatiýa pleý-off-a çykmak mümkinçiligini ýitirdi, sebäbi Sloweniýa ony üçünji orunlaryň arasynda top-4-den çykardy. Belläp geçsek, Sloweniýanyň milli ýygyndysy taryhda ilkinji gezek Ýewro-nyň pleý-offuna çykdy.
C toparçada jemleýji ýagdaý:
- Angliýa (5 utuk)
- Daniýa (3)
- Sloweniýa (3)
- Serbiýa (1)
