Düýn, 23-nji iýunda Saud Arabystany Patyşalygy şu ýylky haj möwsümi hakynda maglumat berdi. Saud Arabystanynyň KHBS wekilleri Saglyk ministri Fehd Al-Jelaliniň teleýaýlymdaky çykyşyna salgylanyp, hajylaryň ybadatlaryny doly berjaý etmekleri üçin ähli mümkinçilikleriň döredilendigini beýan etdiler.
«Bu ýylky haj möwsümi howanyň aşa gyzýan wagtlaryna gabat geldi. Hajyň esasy günlerinde Mekke şäherinde howanyň gyzgynlygy kölegede +51,80C derejä ýetdi. Muňa garamazdan hajylar dessin lukmançylyk kömekleri bilen üpjün edildi. Häzirki güne çenli 465 müň ýöriteleşdirilen lukmançylyk kömekleri berildi» diýip, Saud Arabystanynyň Saglyk ministriniň sözünde ýatlanylýar. «Haj möwsüminde ýokanç keselleriň hiç biri hasaba alynmady. Diňe howanyň aşa gyzgynlygy zerarly öz ýurtlaryndan ulagly ýa-da pyýada gelen zyýaratçylaryň käbirinde Gün urmasy ýaly hadysalar boldy» diýip, ministriň sözlerinde beýan edilýär.
Haj ministri Tewfik al-Rabianyň aýtmagyna görä, 1445-nji hijri-kamary ýylynda (2024-nji ýyl) 200-den gowrak döwletden 2 million 833 müň 164 sany adam haj zyýaratyny berjaý etmäge geldi. Şolaryň arasyndan 221 müň 854 adam Saud Arabystany Patyşalygynyň öz raýatlarydyr.
